لغات البرمجة
السلام عليكم ورحمة الله وبركاته
ازاى تبدأ برمجة الجزء التانى ( لغات البرمجة والأساسيات ) ؟
1 - علشان تبقى مبرمج لازم تكون متقن الأساسيات كوويس جداا ومتقن للـ OOP وفاهمه كويس جداا لأنه تقريباا هو اساس كل حاجة موجودة حوالينا دلوقتى فى مجال التكنولوجيا.
2 - اللى بيفرق بين المبرمج الكويس والمبرمج اللى مش كويس هو مدى اتقانه للأساسيات والـ OOP وازاى بقدر يستخدمهم وازاى يطلع بيهم حل كويس لمشكلة واجهته.
3 – طريقة فهمك للأساسيات والـ OOP مش معتمدة اطلاقاا على لغة برمجة واحده , بمعنى محدش يجى يقولك علشان تبقى مبرمج كويس وشاطر و و و لازم تكون بتعرف تكتب C او C++ او او . الكلام دا غلط انت لازم تفهم الكونسبت العام او القاعدة العامة وبعد كدا تطبقها بأى لغة برمجة .
4 - لغات البرمجة كلها بتشترك فى انها لازم تحقق كونسبت معين , ازاى بقى وايه الكود اللى يحقق الكونسبت دا بقى اللى بيختلف من لغة للتانية .
مثال : IF Condition ,, كقاعدة عامه بتختلف من لغة برمجة لأخرى ؟؟ أكيد لا هيا القاعدة واحد , بس طريقة كتباتها من لغة لتانيه ممكن تختلف ( مش كتير ) .
5 - علشان نختار لغة برمجة يبقى اهم حاجة نختار لغة على أساس انها تفهمنا الكونسبت كويس جداا وبعد لما نفهم القاعدة العامة ممكن بعدها نحول لأى لغة برمجة الموضوع هايبقى سهل جداا :)
رأى شخصى : لغة الـ C من اهم اللغات اللى لازم اى حد بيبدأ برمجة يبدأ بيها , ولو عايز تتعلم الـ OOP يبقى تتجه للكبير C++ :)
معلومات عن لغات البرمجة :
اولأ لغات البرمجة احنا قولنا انهم كتير , طويب ايه اللى مختلف بين واحده والتانيه ؟! الاختلاف احيانا بيبقى بسيط يكاد يكون معدوم يعنى لغة زى PHP موجهة للويب وعندى لغة تانية زى Python مش موجهة للويب بس موفرالى امكانية انى اوجهها للويب , والجافا بنستخدمها كتير فى الاندرويد وبردو ممكن Python استخدمها فى الاندرويد وحاليا الـ C# دخلت سباق الاندرويد من خلال Xamarin وهكذا ..
طبعاا محدش يقول انا هاتعلم كل اللغات دى علشان ابقى جامد ومحدش زيى .. مافيش الكلام دا خالص كداا انت بدأت مشوار الفشل فى البرمجة لو فكرت انك تعمل كدا :D
دلوقتى انا هاكلمك عن شوية لغات عريقة , وهاديكم شوية معلومات عنهاا , بس لو عايز تزود معلوماتك عن كل لغة تقدر تقرأ عنها مقالات تانية مخصصة للغة دى :)
- Python : لغة حديثة ومتطورة جدااا وبتطور كل يوم اكتر عن اليوم اللى قبله ودا لانها لغة Open Source , وبتستخدم مترجم فورى Interpreter وبتدعم الـ OOP . اللغة ممكن تتكامل مع لغات تانيه كتير ومنصاتها متعددة ويندوز ولينكس وماك واندرويد , مرنة جداا وناس كتير من اللى يستخدموا بايثون بيقولوا انها بتسهل عليهم تطوير ادوات بكفاءة عاليه وبمجهود اقل دا غير انها سهلة التعلم .
- C : أم اللغات كلها تقريباا , مافيش لغة مش واخده منهاا حاجة او مش مبنيه عليها , لغة الـسى مبنية من لغة كان اسمها B واللى كانت مبنية من لغة تانيه اسمها BCPL . اللغة من مميزاتها انها بتقدر تتعامل مع الهاردوير كويس جداا وتقريباا هى مصممه لكدا اصلاا وسريعة فى التعامل معاه . لغة السى منتشرة فى تطبيقات كتير , بس اغلب استخدامها بيكون فى انظمة التشغيل ومافيش نظام تشغيل حاليااا مش اساسه لغة C .
- C++ : بنت أم اللغات :D , اللغة دى اخدت كل مميزات لغة السى وضافت عليها جزء مهم جداا وهو الـ Classes و الـ OOP . لغة زى لغة السى بقوتها دى ومميزاتها كان لازم ليهاا اضافة اقوى زيهاا وعلشان كداا اضافوا ليها امكانية البرمجة الكائنية وغيروا اسمها :D
- Java : اللغة المتدلعة :D , الناس لما بدأوا يتعاملوا مع الاجهزة كتير وانتشر ان لكل واحد جهاز فكان بيبقى فى ناس عندهم Mac وناس عندهاا لينكس وناس عندها ويندوز :D . فالبرامج بتاعت لغات البرمجة اللى فوق دى مش Cross platform لو عملت برنامج لازم تعدل فيه 3 مرات علشان يشتغل على ال 3 انظمة فقالوا كدا ماينفعش , راحت شركة Sun Micro systems قلدت لغة السى بلس بلس واضافوا لها امكانية انها تشتغل على كل انظمة التشغيل , وبالتالى هى لغة قوية زيهم :)
البداية مع الـ C++ :
وبما أننا هانبدأ بلغة البرمجة نتعلم منها الكونسبت والـ OOP يبقى انا هاختار لغة كبيرة اللى هيا هاتبقى ان شاء الله C++ ومواضيعى كلها هاتتمحور حواليها ان شاء الله .
ملحوظة : أى حاجة مش عارفها اتعود دايماا تـ Goolge it
لغة البرمجة زى ما قولنا انها أداة مش اكتر بتخلينا نحول الفكرة لكود منطقى الكمبيوتر يقدر يفهمه ويساعدنا فى حل المشكلة اللى بتواجهنا , يعنى الأول لازم نفهم القاعدة وشروطها كويس جداا وبعدين نتعلم ازاى نستخدم الأداة فى ازاى نكود القاعدة دى :)
طويب واحد يقولى خلاص عايز ابدأ اتعلم الـ C++ اعمل ايه ؟
اقوله سهلة بما أننا كلنا مصريين وعرب ومالناش الا بعضينا :D ,, فمافيش غير الباشمهندس : احمد محمد السيد هو اللى هايفيدك فى اللغة لأانه عمل كورس مع اكاديمية الدارين تحفة وكمان فيه ال OOP , ودا اللينك بتاعه :https://www.youtube.com/playlist?list=PLb7yniFBnvZIdfxYIKqNlGsTf5oZy4dKk
واحد كسلان يجى يقولى دا طويل اووى والوقت ومش فاضى .. ؟!
اقوله بطل كسل واتعب , بس علشان مانحرمش حد من حاجة ممكن تبص على البلاى ليست دى للباشمهندس : مصطفى سعد , واحد من الناس اللى بتتعب علشان المحتوى العربى فى البرمجة ودا اللينك بتاعه :https://www.youtube.com/playlist?list=PLPt2dINI2MIZPFq6HyUB1Uhxdh1UDnZMS
البلاى ليست دى متوجهة شوية للناس المهتمه للـ problem solving بس كويسة طبعاا ماتقلقش :)
يجى واحد يقولى انا عايز اقرأ واستفيد اكتر مافيش كتب ؟!!
اقوله لا طبعاا ودى تيجى ماينفعش ,, عندك كتابين مافيش حاجة فى اللغة مش موجودة فيهم اول واحد بس كبير شوية وهو : C++ Primer , والتانى هو كويس بردو وانا اتعلمت منه والباشمهندس : احمد محمد سيد الكورس بتاعه الكونتيت بتاعه من الكتاب دا وهو : OOP in C++كده تمام وعرفنا هنتعلم منين , ايه بقى اللى لازم اتقنه واركز عليه ؟
الأساسيات فى أى لغة زى ما قولنا واحدة ومابتختلفش عليها لغتين , بس هما ايه بقى ؟!
- Input and Output
- Variables and Storing data
- Conditions and Loops
- Structures
- Classes and OOP
الكلام دا خد وقتك فيه وافهمه كويس وكل ماتخلص جزء حاول تتدرب عليه كتير اكتب كود كتير , وافهم كل سطر بيعمل ايه وايه لزمتة علشان ماتبقاش كاتب سطر فى الكود ومش عارف بيعمل ايه ;)
ملحوظة : مش شرط تبدأ بالـ C++ , دا رأيى الشخصى مش اكتر يعنى ممكن تبدأ باللغة اللى تعجبك وتريحك فى كتابتها ولو عايز تعرف اكتر عن اللغات اعتقد عارف ازااى :D
Google It :D :P
الموضوع اللى جاى ان شاء الله هانتكلم عن الـ Clean Code ,, إيه دا مش عارفين يعنى ايه ؟ طويب خليها مفاجأة وصدقونى هاتبقى حاجة مهمه جداا ;)
فى النهاية اتمنى اكون افدتكم ولو بالقليل ومرحباا بيكم فى عالم البرمجة , واستنونى ان شاء الله فى موضوع جديد فى سلسلة
#Legendary_Coder
#المبرمج_الاسطورى
اللهم علمنى ماينفعنى وانفعنى بما علمتنى انك انت العليم الحكيم
